جلست جدتي حول طاولة في ساحة البيت المجاورة للحديقة التي حول البيت. سالتها وقلت لها بالعامية " خرفيني يا ستي عن ايام زمان فقالت: شو بدك احكي يا ستي فقلت لها شو ما بدك. وبدأت تتكلم
زمان يا ستي كنا نقوم بكل شغل الدار بكير الصبح وكنا ما نخلي شي الا ويكون جاهز مثل الاكل الغسيل تنظيف الدار وكل شي. الخبز كان اهم شي يا ستي كنا نروح على الحرش مجموعة بنات ونسوان ونجيب الحطب من الحرش. كنا نمشي حوالي ساعة بالروحة وساعة بالجية. كنا نلم الحطب من الحرش القريب ونعمل حزمة حطب كبيرة نربطها ونمشي فيها لحد الدار. كنا واحنا ماشيات وحاملات الحطب نغني ونحكي مع انو كثير كنا نتعب. الغني بهذيك الايام كان عندو حمار حصان او بغل يستعملو علشان يحمل عليه حطب.
الحطب كان كثير مهم بالدار, كنا نستعمل الحطب تقريبا لكل اشي. كنا نستعمل الحطب ونولع النار علشان نخبز وعلشان نطبخ وعلشان نتحمم يعني لكل شي.
الاكل يا ستي كان كمان مهم ما كان لا في براد ولا في غسالة ولا هواي ولا جلاي. الخضرة والفواكة كانت حوالين الدار كنا نزرع كل اشي وكنا نشتغل بالارض كثير بالصيف وبالشتا. كنا نزرع بندورة وخيار قرع وكوسا ملوخية كل شي كنا نزرع.
كل مرة كانت تهتم لدارها كثير بالاكل والنظافة ويا ستي كان كثير مهم انو المرة تحضر الاكل بكير لانو الزلمة اهم شي عندو هو الاكل لما يروح على الدار. الزلام كانو يشتغلو بترباية الغنم والبقر وبالحصيد والزراعة.
احنا يا ستي كنا بالدار نقوم بشغل الدار ونشتغل بالخياطة زي الصوف كنا نعمل جرازي ومناديل كل شي كنا نخيطة. من الفقر كنا نرقع الاواعي اكثر من مرة, الاواعي الجديدة كنا نشتريها بس على العيد الزغير ونلبسها كمان على العيد الكبير.
حوالين الدار كنا نربي جاج وكنا نلم البيض ومرات كثيرة كنا نوخذ البيض ونبدله بالدكانه باشي ثاني لانو ما كانت الناس تستعمل المصاري كثير وكانت الناس كثير فقيرة. كل دار كان حواليها كم من غنمة وعنزة او بقرة كنا نوخذ الحليب نعمل منو لبن زبدة وجبنة والصوف كنا نستعملو ونعمل منو جاعد (فراش) ونستعملو للنوم.
اكل زمان ما كان فيو لحم كثير كنا نوكل اللحمة مرة بالجمعتين مرات لانو كل عيلة في كل دار كان فيها اقل شي 10 او 12 نفر ساكنين بغرفتين وبس.
ايام زمان يا ستي كانت كثير فقر وتعب بس كثير كانت احلى كانت الناس تحب وتساعد بعضها كان في امان ما كان في سرقة وقتل زي اليوم.  كان في احترام يعني الابن ما كان يخالف ابوه الزغير كان يحترم الكبير وكل البلد كان فيها شيخ يمون على الكل. الناس كانت تحلم لغيرها بالخير مش مثل اليوم.