- أبرز ما جاء في الرسالة:

* بضلهن يقولولي لازم تحب وتعشق ولازم تمشي وتكون جنبك بنت حلوة وامورة

* وولما اقلهن بنات الناس مش لعبة بيقولولي انة انتي ما عم تلعب فيهن وانك رح تحب زيك زي غيرك وبقولولي اني شب حليوة والف بنت بتتمنى اصاحبها

* أصحابي بالليالي بكونوا يأرجلوا وأنا بيناتهم وبيعزموا علية وانا ما بقبل لأنو هيك ابوي علمني وهيك تربيت ولما برفض بيصيروا يقولولي انت واحد عايش بكوابيس

* حاطط ببالي اني اتعلم من زمان واصير طبيب والحب والحكي الفاضي بكير ومع هيك برجعوا وبجاوبوني لا بكير ولا يحزنون يا زلمة بالعكس اذا مشيت وحبيت خلال الدراسة رح يكون عندك امل وحياه

وصلت الى موقع العرب رسالة من شاب يطلب ارشاد ونصيحة زوار موقع العرب الكرام. موقع "العرب" يؤكد انه وحفاظا على النزاهة والمصداقية الصحفية ينشر الرسالة تماما كما وصلت الى مكاتبنا، من دون زيادة او نقصان، وبدون تعديلات لغوية او تصحيح اخطاء املائية.

الرسالة هي التالية:
مرحبا لكل المعقبين ... انا شب عمري 17 سنة من الشمال مشكلتي هي مع اصحابي , انا ولد علمني ابوي ورباني تربية صالحة وانا اليوم عم اواجة صعوبات بالنسبة لأصحابي الي ما ممكن اقدر اتركهن لأننا تربينا مع بعض منذ الطفولة , انا من اخر 3 سنين عم حس نفسي غريب بيناتهن وبضلوا يقولولي انت واحد معقد وميت بالحياه وكل هذا لأني ما بستعمل الارجيلي وما بأرجل معهم وما بحب وماشي مع بنات متلهم , بالنسبة للأرجيلي بنجلس ليلة السبت وباقي الليالي وبكونوا يأرجلوا وأنا بيناتهم وبيعزموا علية وانا ما بقبل لأنو هيك ابوي علمني وهيك تربيت ولما برفض بيصيروا يقولولي انت واحد عايش بكوابيس.

 صورة توضيحية فقط!

اتفتح يا اخي على الدنيا ,الدنيا تطورت يا اخي , وبالنسبة للبنات بضلهن يقولولي لازم تحب وتعشق ولازم تمشي وتكون جنبك بنت حلوة وامورة وولما اقلهن بنات الناس مش لعبة بيقولولي انة انتي ما عم تلعب فيهن وانك رح تحب زيك زي غيرك وبقولولي اني شب حليوة والف بنت بتتمنى اصاحبها واني اذا بضل هيك رح ادمر حياتي وادفن نفسي بالحياه , وبقلهن خليني اول شيء اتعلم وابني نفسي وانا بدي اتعلم وحاطط ببالي اني اتعلم من زمان واصير طبيب والحب والحكي الفاضي بكير ومع هيك برجعوا وبجاوبوني لا بكير ولا يحزنون يا زلمة بالعكس اذا مشيت وحبيت خلال الدراسة رح يكون عندك امل وحياه وشيء تدرس وتتعلم علشانوا وهي حبيبتك...انا بصراحة يا اخوان مش عارف شو اعمل انا يأست بدي حل لهالمشاكل انا عم حس نفسي غريب وما عم اتأقلم مع جو هذا المجتمع,,, أاأاأاأخ يا ريتنا ما كبرنا , الله يلعن هيك وقت . بتمنى اشوف حلول جذرية وتساعدوني وشكرا حبايب قلبي

يطلب موقع "العرب" من زواره عدم التعقيب بصورة طائفية عنصرية وعدم الانجرار وراء معقبين عنصريين، وتسعى إدارة موقع "العرب" بتشديد الرقابه على التعقيبات وبحذف جميع التعقيبات التي تمس بأي طائفة. كما نلفت انتباهكم انه يمكنكم ارسال مشاكلكم على العنوان التالي: alarab@alarab.co.il