وصلت الى موقع العرب رسالة من فتاة تطلب ارشاد ونصيحة زوار موقع العرب الكرام. موقع "العرب" يؤكد انه وحفاظا على النزاهة والمصداقية الصحفية ينشر الرسالة تماما كما وصلت الى مكاتبنا، من دون زيادة او نقصان، وبدون تعديلات لغوية او تصحيح اخطاء املائية..

السلام عليكم ورحمه الله يشكر موقع العرب الا بعطينا مجال نحكي مشاكلنا ونفضفض بلي جوات قلبنا راح احكي قصتي بلعاميه .. انا صبيه عمري 18.5 من الشمال يتيمه الاب والام ومليش غير اخ واحد اهلي ماتو بحادث طرق لمن كان عمري 5 سنين اخدتني ستي ربتني والحمدالله عالاصول واحسن تربيه تربيت بس المشكله انو بشتاق لاهلي لالهن اشي غريب وما بنام الليل الا ابكي ما الي حدا غير ستي الله يخليلي اياها ويطول بعمرها ويشفيها يا رب مش عارفه لسمح الله اذا صرلها اشي كيف راح اكمل حياتي من غيرها وين اروح ودايما بخاف من المستقبل لقدام ... نفسيتي عم تتعب وكثير كمان بس ما بحسس حدا بكتم بقلبي الحلو فيي اني صابره بس لوينتا وشو راح يكون مصيري بهالحياه حتى الناس ما بترحم وبتعاير باني يتيمه ليش الظلم طيب انا شو ذنبي اكون هيك؟؟ قولولي ؟؟ لا اعتراض عمشيئه الله عز وجل.. اخوي بتعلم ببلاد بره طب عام وما بشوفو الا بسنه مره وبس بتواصل معو عبر الانترنت بحبني كثير وبخاف علي و كل يوم بطمن عليه بس هو ما بيعرف شو بحس واني تعبت ما بحب احكيلو همومي هو مفكر انو عايشه مبسوطه لانو بشوف معامله ستي الي بس قلبي عم بنهار وموجوع كثيـر القلق والخوف مراوديني عطـول والتفكير شاغل بالي ... تقدمولي كثير بس كل شخص بتقدملي ما بيطلع الا عالجمال وهالشغلات العاطله انا بدي انسان يعوضني عن كل اشي خسرتو من حياتي من حب وحنان وعطف ويعمل المستحيل كرمالي وما يحسسني بانو مكسوره الخاطر ومليش حدا بهالدنيا.... وحتى اعز صحابي ما بيفهموني ودايما بنظرو الي نظره غريبه وكاني انا السبب بلي صرلي والله عم بحكيلكو ودموعي تنزل مش قادره استحمل حابسه حالي بهالغرفه سودت بوجهي ما بطلع مشاوير لانو الوضع ما بسمح وستي مريضه وانا الا بعوم فيها و( بدير باليي عليها ) ملييش غيرها وراح اعمل المستحيل عشانها ولو راحت مني حيتي كلها بتروح__ اتعرفت عصديقه بسهره قرابتنا وكثير ارتحتلها وحبيتها هالبنت كمان هيي امها متوفيه بس ما بتفضى وما بشوفها كثير لانو مسؤوليه البيت كلى عليها ولا بحكي معها لانو كل واحد وظروفو بس حابي كثير اتقرب منها بحسها انسانه واعيه وفاهمه الحياه. بتمنالها كل خير لانو بجد بتستاهل ويا ربت اذا شافت قصتي تعرفني ونتقابل مره تانيه يا (س) بتمنى انا ..י ستي بقيمه امي وابوي هي حياتي كلها هي واخوي بس مش عارفه شو اعمل يا ريت فيكو تساعدوني ولو شوي تخففو عني والله حرام اعيش هيك حياه .. والله لا يحرم حد من اهلو واعز اصحابهن .......ادعولييييي .. سلالالالام

موقع "العرب" يوجه عناية الزوار الى انه بامكانهم ارسال مشاكلهم وتساؤلاتهم الى الموقع لاخد رأي الزوار فيها على alarab@alarab.co.il

كما ويتوجه موقع العرب الى المعقبين الكرام الامتناع عن السب والشتم والتجريح العنصري والتعقيب بصورة موضوعية ومهنية ومناقشة القضية بإحترام مهما كانت صعبة، فصاحب القضية يكتب لموقع العرب طالباً المساعدة والنصيحة من زواره ولن نقدم المساعدة له بإستعمالنا الكلمات النابية.