بقلم: سيمون عيلوطي

عْيوني ... شوقِ لْطَلعتَكْ قلبي قُمَرْ اخْضرْ سابِح بِنَهْر مْحبّتَكْ ... تَيْبوّسَك ... تْشَعْبَط عَلَى كْتافِ الأصيلْ ما عْرِفِتْني ؟؟! إلْ شافْني يْقلِّي إلك... طالع مِثِلْ نِسْماتُو .... صَوتَكْ ... غُنْوِتَكْ... لمّا تِتْغَزَّلِ بِوجْنات النَّخيل. *** شامِخْ بِوَسْط المَرجْ راسخْ مْعلِّي الشَّجرْ خلّيك مِثْل غْصونْها ... هَالضامِّه العُصْفور مِن نذف الثَّلِجْ عا قلبي يِصير النُّور ... زينِه مْشَكّلِه بْأحلى صُوَرْ دَقَّات قلبي تْظلّ تِرْهَجْلَك رهِجْ خليكْ.. لـَ هالْمَسْحور رَعْشات الأمل يِنْشَدّ صوبَكْ ييجي يِكْرُجْلَكْ كَرِجْ ما بْيَعْرِف بْحبَّك حُدود المُستحيل *** ما عْرِفْتني ؟؟! يا بين هالغيمات شامِخْ بالجليل ؟؟ قلبَك تْنَطْنَطْ وَرا زهرَكْ ... وَرا مجدَك ... وَرا حبَّك ... وَرا وعْدَك تَنُّو يُغْبُطْني ... ويْضُمْ هيكي جُرحي عا جُرْحكْ مِنِ الشّوق أنبِتْ "ميرميِّه" عا سطحَكْ "بَرْقوق" أتمايَلْ مع النَّسمِه على سفحَكْ..،.. تِعْلى إنتْ دوالي ... اتْعَرْبَشْ أنا ... عَلَى سِحْرَكْ نِتْشَكَّل بْهاللّيل أنا ويّاكْ ألمْ واحَدْ حلمْ واحَدْ بُعدْ واحَدْ وجعْ واحَدْ نِتْلَمْلَم ويِنْضَمّ جُرحي عَ جُرحَك مِنْ نَزيْفو نِعرِف نِلْقى مَرهَم للعليل *** لما نوّار الوَعِد فتّحْ هوانا وْشافْ دمعات الفرح تِكْرُجْ عَلَى خْدودي مِنِ عيونَكْ مِنِ عْيوني عَلَى خْدودَكْ..،.. شنّو الموت حصرْ مرَّه شنقْ مرَّه صلبْ مرَّه حصدْ مرَّه كل نقطِةْ دَمّ تِطْلَعْ سِنْبُلِةْ... زهْرَه نَعْنَعَه خضْرا تزْرَع بْهالْموتْ روح تِحْيي عَلى خْدودَك صَبر نَجْمِه ... عِطرْ ... وابْقى أنا شمْعَه ... عشِق خُصلِة حَبَقْ غُنْوَه ... دليلْ ... وِنْظَلّ انا وأنتَ جليلْ.

* الجرمق: أعلى جبل في فلسطين

 موقع العرب يفسح المجال امام الكتاب لطرح أفكاركم التي كتبت بقلمهم المميز ويقدم للجميع مساحة حرة في التعبير عما في داخلهم ضمن زاوية منبر العرب. لإرسال المواد يرجى إرفاق النص في ملف وورد مع اسم الكاتب والبلدة وعنوان الموضوع وصورة شخصية للكاتب بجودة عالية وحجم كبير على العنوان alarab@alarab.com