اكتشفت أن حبيبي الوطني هو شاب مزيف وقد خدم بالجيش.. علاقتنا بوضع محرج!

- ابرز ما جاء في الرسالة :

* بعد 3 سنين من الحكي والحب .. اكتشفت انه خان وطنه وخان قلب حبه

* انا صبية عمري 23 سنة ومن يوم ما خلقت وانا عندي حس الوطنية لانه تربيت بقلب بنبض وطن

* بمسيرة العودة تعرفت على شب عن طريق الصدفة وقعدت اتناقش انا وياه وضلينا ماشيين سوا طول المسيرة واحنا نحكي

وصلت الى موقع العرب رسالة من فتاة تطلب ارشاد ونصيحة زوار موقع العرب الكرام. موقع "العرب" يؤكد انه وحفاظا على النزاهة والمصداقية الصحفية ينشر الرسالة تماما كما وصلت الى مكاتبنا، من دون زيادة او نقصان، وبدون تعديلات لغوية او تصحيح اخطاء املائية.

الرسالة هي التالية:
مرحبا موقع العرب ... عندي مشكلة جدية ولما شفت المشاكل بموقعكو تشجعت كتير اني اطلي مساعدتكو ...  انا صبية عمري 23 سنة ومن يوم ما خلقت وانا عندي حس الوطنية لانه تربيت بقلب بنبض وطن وهيك كبرت واهلي ما كانو يعارضو لانهن هيك ربونا  . دايما كنت اشارك بالاضرابات والفعاليات الحزبية والوطنية المختلفة بكل مكان ودايما كانت الكوفية مرافقتني  ودايما كنت موجودة باي مضاهرة بتصير .. ومرة ولما كنت بمسيرة العودة تعرفت على شب  عن طريق الصدفة  وقعدت اتناقش انا وياه وضلينا ماشيين سوا طول المسيرة واحنا نحكي ... كانت اول مرة بحس حالي بحكي مع حدا واعي وعلى مستوى فهمي ووطنيتي ... خلصت المسيرة بهداك النهار الي مش رح انساه اكيد بس ما انتى لقاءنا انا وياه  .. تطورت علاقتنا وصورنا نحكي تلفونات ونشوف بعض ودايما كنت احكيلو عن اي فعالية وطنية بتصير وكان دايما مستعد للحضور وما عنده اي مانع وهاشي كان يعلقني في اكتر ويقوي علاقتنا .

 
صورة توضيحية فقط!!!

وبيوم من الايام ولما كنت انا وياه بمسرحية اجا واحد صاحبه يسلم عليه وقعد يحكي هو واياه وفجأة قله : "معقول انت جاي تحضر هيك مسرحية !!! غريبة يا زلمة ما الك سني مخلص خدمة مدنية واسا عامل فيها وطني والله ما حدا قدك " ههههه ! ...
كانت اكبر صدمة بحياتي ... ما عدت عارفة شو احكي معاه ولا حتى عدت قادرة اتطلع بعيونو وهو كمان حس هذا الشي وما علق على الموضوع ... حسيت بخيانة كبيرة ، بعد 3 سنين من الحكي والحب .. اكتشف انه خان وطنه وخان قلب حبه ! .. خاب ظني فيو كتير وقعدت فترة كتير كتير كبيرة ما اطلع ولا انزل ولا اشارك باي اشي بصير وانا افكر بالموضوع .... ومن وقت ما اكتشفت حقيقته المزيفة وهو يحاول يتصل فيي ويبرر خدمته بانها كانت للتسهيلات المستقبلية مش اكتر ... وسبب مشاركته بمسيرة العودة الي كانت بعد نهاية خدمته دليل على انه رجع لاصله ووطنه !!!!
انا حبيته كتير وما بنكر اني تعلقت في كتير وصعب انساه وبالذات انه وصل الاشي بينا لحد التفكير بالارتباط الجدي ... محتارة ... وفي براسي مليون سؤال ....! شو اللي خلاه يفكر بالخدمة المدنية ... وليش ما لاقى حل تاني يساعده بتسهيلات المستقبل الي تحجج فيها ... وليش ما صارحني من الاول ... !!! مش عارفة اذا اصدق كلامه وتبريراته ! ... ومحتارة كتير بين حس الوطنية الي ربيت علي وبنبض جواتي وبين انسان حبيته بكل قلبي الي بحقد على كل انسان بخون وطنه وشعبه !...

يطلب موقع "العرب" من زواره عدم التعقيب بصورة طائفية عنصرية وعدم الانجرار وراء معقبين عنصريين، وتسعى إدارة موقع "العرب" بتشديد الرقابه على التعقيبات وبحذف جميع التعقيبات التي تمس بأي طائفة. كما نلفت انتباهكم انه يمكنكم ارسال مشاكلكم على العنوان التالي: alarab@alarab.co.il