تائهون بين نارين! أمي وأبي يشتمان بعضهما بعد طلاقهما.. فمن نختار؟

- ابرز ما جاء في الرسالة:

* امي وابوي قرروا يطلقوا وبالفعل امي رجعت لبيت اهلها واحنا بقينا بالبيت مع ابوي

* بعد ما امي وابوي اطلقوا انا واخوي تغلبنا وبطلنا نحس لا بخصوصية ولا انوا احنا عيلة مترابطة بل العكس

* لما نكون زيارة عند ابوي ما بيترك امي بحالها بالحكي وبيقول انها قوية وخربتلوا بيتوا وعماتي بيحكوا عليها

*لما نكون بزيارة عند امي ما بتخلي حكي على ابوي ان هو تبع نسوان وما بيهتملنا وما بيدير بالوا علينا وما بيحبنا

* امي وابوي  رفعوا محكمة على بعض بحق حضانة عشان يقرروا مين بدوا يوخذنا ومع مين نعيش او معو او معها

وصلت الى موقع العرب رسالة من فتاه تطلب ارشاد ونصيحة زوار موقع العرب الكرام. موقع "العرب" يؤكد انه وحفاظا على النزاهة والمصداقية الصحفية ينشر الرسالة تماما كما وصلت الى مكاتبنا، من دون زيادة او نقصان، وبدون تعديلات لغوية او تصحيح اخطاء املائية.

الرسالة كالتالي :
مرحبا لزوار الموقع انا بصراحة مشكلتي كتير محيرتني انا صبية عمري 17 سنة وحيدة والي اخوا واحد عمروا 8 سنوات عشنا ببيت كلو سعادة وفرح لحد ما قامت المشاكل وما قعدت بين امي وابوي , امي وابوي كل يوم بيتغاوشوا ان كان على الفاضي او الملان هو بيتهم امي بالاهمال وبيشك فيها وهي كمان ما بتأمنلو وبضل تقول انو مصاحب عليها وبيحكي مع بنات .
المهم المشاكل ما كانت تهدى بيناتهن لحد ما اجا اليوم الي تنيناتهن ما عادوا طاقوا بعض ووصلت بينهن انو رفعوا ايديهن على بعض فقررروا انهين يطلقوا وبالفعل امي رجعت لبيت اهلها واحنا بقينا بالبيت مع ابوي فترة قصيرة وبعدها امي طلبتنا ورحنا عندها سكنا .
بعد ما امي وابوي اطلقوا انا واخوي تغلبنا وبطلنا نحس لا بخصوصية ولا انوا احنا عيلة مترابطة بل العكس تفرفطنا وانا واخوي عيشنا عيشة بتقرف عند اهل امي الي دايما بيحكوا على ابوي وبيقوا انو هو وسخ وانسان مش نحترم ما حترم مرتوا وولادوا وامي طبعا ما بتدافع علي لا وبتصير تحكي معهن .

صورة توضيحية

ولما نلروح عند ابوي نفس الايشي بيصيروا عماتي يحكوا على امي انها قوية وخربت بيت ابوي وحكي يمين وشمال .
انا واخوي ما بنعرف الله وين حاططنا علاماتنا رجعت بالمدرسة واتفرقنا كعيلة .لحد ما اجت المصيبة الكبيرة انو امي وابوي تقاتلوا علينا كل واحد بدو ايانا واحنا مش عارفين نقرر مع مين نعيش .وفي النهاية رفعوا قضية  حضانة عشان يقرروا مين بدوا يوخذنا .
فبعد ما رفعوا القضية ابوي صار يحكي حكي كتير عاطل عن امي وعن حياتها وانها راح تغلبنا وما راح نقدر نعيش معها . وامي نفس الشي لما تقعد معنا بتقعد تحكي عنوا انو بيعرف نسوان وراح يصير يجيبهن وينيمهن معنا بنفس البيت .المهم انا واخوي مش عارفين شو نعمل حيرونا ولا واحد فيهن حمل همنا انو احنا شو نفكر او شو نعمل والاصعب امي بتقول اذا روحتوا مع ابوكوا انا لا امكوا ولا بعرفكوا ,وابوسي بيقولنا انو مش راح يكون معنا كتير منيح اذا رحنا مع امي ....احنا وين ...شو نعمل هادا اصعب موقف مريت في بحياتي ...مع مين اروح ومين اختار ؟ ليش اهلي ظلمونا وما فكروا بمصلحتنا قبل ا يفكروا بمصلحتهن هني؟ اختار امي او ابوي؟ ومع مين يا ترى راح اعيش مبسوطة ؟ وهل اذا اخترت امي راح اخسر ابوي او العكس ...؟ ساعدوني ما بدي اخسرهين انا كتير متحيرة..؟ وخايفي اختار واحد منهن ويكون اختياري خطأ ..

يطلب موقع "العرب" من زواره عدم التعقيب بصورة طائفية عنصرية وعدم الانجرار وراء معقبين عنصريين، وتسعى إدارة موقع "العرب" بتشديد الرقابه على التعقيبات وبحذف جميع التعقيبات التي تمس بأي طائفة. كما نلفت انتباهكم انه يمكنكم ارسال مشاكلكم على العنوان التالي: alarab@alarab.co.il