أبرز ما جاء في الرسالة:

أنا بطلع مع صاحباتي وبطلع مع كل الناس ما بزعلو بس مع خطيبي بغارو وبكشرو والمشكلة إنهن بكشرو قدامو وهو صار يعرف بطل يسخى يحكيلي تعالي عنا 

وصلت الى موقع العرب رسالة من فتاة تطلب ارشاد ونصيحة زوار موقع العرب الكرام. موقع "العرب" يؤكد انه وحفاظا على النزاهة والمصداقية الصحفية ينشر الرسالة تماما كما وصلت الى مكاتبنا، من دون زيادة او نقصان، وبدون تعديلات لغوية او تصحيح اخطاء املائية.

الى زوار موقع العرب أرجوكم ساعدوني.. أنا بنت عمري 24 سنة .. جامعية ومحافظة الحمدلله إنخطبت من سنتين لشاب بعد ما حبينا بعض لسنين .. بس الظروف ما كنت تسمح نخطب قبل لأنو أكبر مني بسنة وبعدو ببني حالو وبساعد أهلو إمي كانت على علم من أول يوم بعلاقتي معو .. دعمني كتير وساعدني وقربني من الدين وكان صحاب هو وأخوي. أبوي كان معارض العلاقة لأنو برايه إني لازم أخود شاب متعلم . بس خطيبي تعلم وظروفو جبرتو ما يكمل .. فعمل كورسات وفتح شغل لحسابو والحمدلله بنادم مثقف وبفهم أكتر من مية زلمة بعمر سيدو .. يعني حتى لما يتناقش مع أبوي أو زلام أكبر منو الكل بسمعلو المشكلة إنو أهلي حاصريننا بطريقة مش طبيعية. كتبنا الكتاب المثبت الحمدلله عشان يكون كل إشي حلال بيننا بس مع هيك ولا كأنو كتبناه. إذا بدو يعزمني على أي محل لو لساعة بدها يومين تمهيد لأهلي .. إذا بدي أطلع معو بمية ترجاي .. إذا بدي أروح على بيتهن مع إنو بعيد عن بيتنا 10 دقايق .. رح أرجع الاقيهن مكشرين فيي.. ولازم أعملهن مقابل لطلعتي.. قال ما إنتي دايما بتدرسي ومش فاضية.. لإلو بتفضي.. طب هاد خطيبي وهاي الفترة ما رح تنعاد بحياتنا... هو مستحمل وصار يفكر أهلي ما بحبوه .. حتى إمي بحسها خصوصي بترفض أطلع معو وبسمع مية كلمة منها.. صرت أغار من باقي الخطاب مع إنو ما في تنين بحبو بعض متلنا.. إذا حكالو كلمة غزل معي قدامهن بصيرو يتمسخرو.. إذا روحت عند دار أهلو لازم تاني يوم أروح مع إمي وين بدها .. طب أنا بنت واعية ومسؤولة وبعرف كيف أقسم وقتي وما أقصر بحدا.. أنا بفترة دراسة وهني مفكرين إنهن هيك صح.. بس أنا ما عم بدرس قد ما عم بتدايق.. هني بحجة إني لا عم أساعد بالبيت ولا عم أطلع زي قبل حارميني من خطيبي.. بصراحة صرت أحسهن ما بحبوه وبطلو يحبوني ولا يحبو أنبسط معو.. كلمة الله يرضى عليكي ما بسمعها من إمي قد ما بسمع نقها إني ما بساعدها وما بتشوفني.. بس هيك وضع كل البنات إلي بتعلمو معي.. موضوعي صعب وبدو دراسة قد ما حكيت مش عارفة أوصف العدائية والإستهتار الي صارو يعاملوني فيها.. بطلت أحب أشاركهن بإشي .. بطلت أحس إنهن عنجد بحبوني.. وعلى فكرة ما تفكرو الإشي تعقيد أو تتدين لأني أكتر وحدة ملتزمة بالبيت.. أنا بطلع مع صاحباتي وبطلع مع كل الناس ما بزعلو بس مع خطيبي بغارو وبكشرو والمشكلة إنهن بكشرو قدامو وهو صار يعرف بطل يسخى يحكيلي تعالي عنا أو إمشي نطلع مشوار أحسن ما تكون علي جمعة نحس.. وأنجبر أضيع كل الأسبوع وأنا أثبتلهن إني فاضية وما علي دراسة ولا شغل.