زَجل العيد في لَمِّةِ الأحباب/ بقلم: أسماء طنوس

العيد إِلو نَكْهَه في لَمِّةِ الأَحباب كُل ما بِيلتِقوا بِتزيد أَفراحُه والعيد بيبقَى عيد في رَجْعِةِ الْغِيّاب كُلّ ما بِيُطلّوا عطورهُم فاحوا ولمَا تصافِح قريبَك وتِنْسَى كُلّ اسْباب وِتْعَزّي كُلّ مِسكين وتِشْفيلُه جْراحُـه وِالعيد ما هو أَكْل ما لَذَّ وَطاب وعيونَك عَالفقير ما اتْطَلَّعوا وزاحوا العيد بَسْمِة أَمَل وتَشْجيع لِلّي خاب تَتِرْجَع هِمِّتُه ويِنْسَى اللّي هُم راحوا وقلوب تِتْصافَى ما يْدور بينها عْتاب وِيْعُمّ فيها الرِّضَى مِن الْبُغْض إرتاحوا وينْسوا اللّي بينهُم كان مِن غَيْرِ حِساب وعَكُلّ شي مِتْعِبْهُم بِهِ طاحوا وِالعيد صَفْحَه جديدِه في أَوَّل كِتاب الكُتْبِ الْعَتيقَه مِن فِكرِكَ اتْماحوا ويا اللّي رِجِع لَرَبُّه وعَن ذُنوبُه تاب رَيَّح ضَميرُه والْبَسمات قَد لاحوا موقع العرب يفسح المجال امام الكتاب لطرح أفكاركم التي كتبت بقلمهم المميز ويقدم للجميع مساحة حرة في التعبير عما في داخلهم ضمن زاوية منبر العرب. لإرسال المواد يرجى إرفاق النص في ملف وورد مع اسم الكاتب والبلدة وعنوان الموضوع وصورة شخصية للكاتب بجودة عالية وحجم كبير على العنوان:alarab@alarab.net