بقلم: سيمون عيلوطي

كل مَ التَقينا ليش
مِنِّي تُهْرُبي
وشو أكتبلِك
عَ فيسِك تُشطُبي
كُنتي إذا غِبِت ساعَه
تْعَصِّبي
تِستَعجِليني على الواتس
وْتِعتَبي
شو صار تا ما عُدتي
تْقرِّبي...
كل مَ التَقينا شَرْ
هيكي تُنصُبي؟ّ!
***
كِلْمات شِعري كْثير
كُنتتي تُقطُفي
تِتغَنِّي فيها وْياما
منها تِعزِفي
وِتعيشي معها تِهمِسي
وِتْوَلِّفي
حْكايات تِحكيها
عن حُبِّي الوَفي
تْقولي أعمَلِّك أساوِر
من سِحِر ...
أغْزِلِّك شالات
مِ خْيوط البَدِر
خُلْخال أجِبْلِك
من لولو هَالبَحِر
فيكي شو أكْتِب قَصايِد
تِلْهِميني بِالشِّعِر ...
صُبْح وْمَسا عَمْ بَخِّرِك
في هَالعِطِر
وأنْعَف تَحِت دَعساتِك
كُلِّ الزَّهِر
أغْسِل إيديكي في
صافي هَالخَمِر
باسْمِك أرَنِّم
مِثِل تَرنيم الصَّلاه
وفيكي أتعَبَّد
يا ريم الفَلا...
في سَماكي أتوب
إنْتي مَطلَبي، ...
العَجيبِه تِعلِني
إنِّك طَقسي وْمَذْهَبي
وْعا مَذبَح حُبِّك ...
قلبي تُصلُبي!!
***
شو صار تا حُبِّك إلي
عَمْ تِنْكِري
قَنِّينِة عِطْر الغِوا
ليش تِكْسِري
تِحرقي كُلْ شي هَديتِك
صورتي مَ تْوفِّري
وْفي أشعاري اللي فيكي
تُكْفُري
مْنين جِبْتي قَلْب
تا قْدِرتي تُهجُري
تْعَذُبيني بِالجَّفا
وْتِتْجَبَّري ...
تِتْمَسْكَني، وِالعُموم
تْخَبِّري
قَلبي من حُبُّه بَري، ...
تِبكي عا بَختِك مَعايي
وْتِندِبي ...
وْعا عَذابي تِفرَحي
وْشو تِطرَبي!!

موقع العرب يفسح المجال امام الكتاب لطرح أفكاركم التي كتبت بقلمهم المميز ويقدم للجميع مساحة حرة في التعبير عما في داخلهم ضمن زاوية منبر العرب. لإرسال المواد يرجى إرفاق النص في ملف وورد مع اسم الكاتب والبلدة وعنوان الموضوع وصورة شخصية للكاتب بجودة عالية وحجم كبير على العنوان:alarab@alarab.com