مبروك نجاحك يا بيي يا هديل/ بقلم: فخري هواش
مبروك نجاحك يا بيي يا هديل في امتحان وزارة الصحة للصيدلة
والله وكبرتي يا بيي
وكبرت فيك فيي الايام يا بيي
مبارح كنتي زغيري
واليوم صرتي صبيه
ربيتك يا بيي بحبات عيني
أًول كلماتك أول ضحكاتك
أًول خطواتك مرسوم بقلبي يا بيي
وصلتك على المدرسة بإيدي
واليوم مسكتي ايدي وقلتي
تفضل شوف زرعك يا بيي
هيني صرت يا بيي صيدلانيه.
ربيتك يا بيي على المحبه والإيمان
تاتحضني الأيام وتحضنيني
مثل ماحضنتك يا بيي
بدعيلك يا بيي من كل قلبي
بإبن الحلال يكمل معك دربي
ويرعاك مثل ما رعيتك يا بيي
وبدعي لربي يحفظ لي الايام
تا تروحي تصرفي
الدوا للعيانين بالصيدليه
وتتركي لي ابنك تا العب
انا ويا وأوصلو على المدرسه بإيدي
مثل ما كنت أوصلك يا بيي
إيه إيه إيه يا بيي
موقع العرب يفسح المجال امام المبدعين والموهوبين لطرح خواطرهم وقصائدهم التي كتبت بقلمهم المميز ويقدم للجميع منبرا حرا في التعبير عما في داخلهم ضمن زاوية منبر العرب. لإرسال المواد يرجي إرفاق النص في ملف وورد مع اسم الكاتب والبلدة وعنوان الموضوع على العنوان:alarab@alarab.net
