طالبة جامعية: حالتنا المادية صعبة وابوي ترك شغلو وخايفة اضطر اترك تعليمي

أبرز ما جاء في الرسالة: مابدي اترك التعليم ومابغدر ولا بأي شكل اترك الشغل مش بس عشاني كمان عشان ادعم عيلتي واساعدهن.. مابعرف شو اعمل

وصلت الى موقع العرب رسالة من شابة تطلب ارشاد ونصيحة زوار موقع العرب الكرام. موقع "العرب" يؤكد انه وحفاظا على النزاهة والمصداقية الصحفية ينشر الرسالة تماما كما وصلت الى مكاتبنا، من دون زيادة او نقصان، وبدون تعديلات لغوية او تصحيح اخطاء املائية.

 مرحبا زوار العرب انا صبية من الشمال عمري 22 سنة، انا بنت لعيلة بسيطة كتير وفقيرة مادياَ وعندي 5 اخوة واهلي ما معهن مصاري يعلمونا ويادوب ابوي بطلع حق اكلنا والأغراض الضرورية من شغلو، وبشتغل ليل نهار عشان يعيشنا انا واخوتي وبعترف انو بعمل كل الي بطلع بايديو.

انا من ما خلصت تعليمي الثانوي بلشت اشتغل ليل نهار واخد ورديات كتيرة بس عشان اجمع لتعليمي، وبعد اكتر من 3 سنين شغل ولما صار معي حق قسط الجامعة وقررت اتعلم ودفعت اول قسط وكنت كتير مبسوطة انو الفقر والحالة المادية ما رح تمنعني من التعليم وكنت فخورة بنفسي .. بس اوضاعنا المادية بتسوء وابوي تعب كتير ووضعو الصحي ما عاد يسمحلو يشتغل متل الاول بعد ما وقع بشغلو وصرت انا مجبورة ازيد شغلي عشان تعليمي وباقي عيلتي 

بطلت اغدر اوفق بين تعليمي وشغلي لانو صرت اتعب كتير ومرات كنت اضطر اتغيب عن محاضراتي عشان الشغل واخد المواد من الطلاب عشان ادرس بس ماعدت اغدر اكمل وتعبت ومش عارفة شو اعمل؟؟ مابدي اترك التعليم ومابغدر ولا بأي شكل اترك الشغل مش بس عشاني كمان عشان ادعم عيلتي واساعدهن.. مابعرف

يطلب موقع "العرب" من زواره عدم التعقيب بصورة طائفية عنصرية وعدم الانجرار وراء معقبين عنصريين، وتسعى إدارة موقع "العرب" بتشديد الرقابه على التعقيبات وبحذف جميع التعقيبات التي تمس بأي طائفة. كما نلفت انتباهكم انه يمكنكم ارسال مشاكلكم على العنوان التالي:alarab@alarab.ne