زوجة 20 عاما: وعدني أن أتعلم بعد الزواج وأنا الآن أم لطفل وحامل مجددا

أبرز ما جاء في المشكلة:

زواجي كان بكامل رغبتي وأنا اللي كنت بدي ما حدا جبرني او اشي من هالشكل

زوجي وعدني انو أتعلم لأني كنت الاولى بصفي وانا كنت ميتة أتعلم

و أنا بعدني 20 سنة أم لطفل وحامل كمان مرة... كتير هيك علي أنا ما بقدر أتحمل كل هالضغط هاد، ودايما بحكي لزوجي انو بدي أتعلم

الرسالة كالتالي:
السلام عليكم ورحمة الله وبركاته... انا زوجة عمري 20 سنة .. الصراحة تزوجت بكير كتير.. خلصت مدرسة من هون تزوجت من هون ... والصراحة زواجي كان بكامل رغبتي وأنا اللي كنت بدي ما حدا جبرني او اشي من هالشكل!! بس قبل ما نتزوج أنا وزوجي قررنا انو نأجل موضوع الخلفة والاولاد ونعيش فترة سنتين أقل اشي لحالنا وبعدين منجيب ولاد... وكمان زوجي وعدني انو أتعلم لأني كنت الاولى بصفي وانا كنت ميتة أتعلم ... المهم وبعد ما تزوجنا ... بشهر .. عرفت اني حامل، وطبعا بطلت أقدر أروح أتعلم..

تصوير: Thinkstock

في الفترة اللي كنت فيها حامل، وعدني زوجي انو بعد ما يخلق الصبي بصير معي وقت أروح أتعلم، واسا بعد ما أجى الصبي اكتشفت من فترة اني حامل للمرة الثانية! وهيك كل الإتفاقات اللي كانت قبل الزواج راحت عالفاضي! و أنا بعدني 20 سنة أم لطفل وحامل كمان مرة... كتير هيك علي أنا ما بقدر أتحمل كل هالضغط هاد، ودايما بحكي لزوجي انو بدي أتعلم.... بس انا حاسة انو بعمري مش راح أتعلم ... وأمي كتير زعلانة على وضعي ونفس الشي أبوي! لدرجة أنهن لما عرفو بحملي للمرة الثانية حسيتهن ما فرحو.. وانا خايفة كتير ... وبغار كتير من بنات جيلي اللي بروحو وبيجو وبتعلمو وشايفات الحياة ..... شو أعمل كيف أتوجه لزوجي؟ ارجوكم بدون سخرية وكلام بشع بالتعقيبات لأنو اللي بواجه المشكلة بكون شعورو كتير صعب وانتو لما تستخفو فيني بالتعقيبات بتجرحوني بلا ما تحسو......

يطلب موقع "العرب" من زواره عدم التعقيب بصورة طائفية عنصرية وعدم الانجرار وراء معقبين عنصريين، وتسعى إدارة موقع "العرب" بتشديد الرقابه على التعقيبات وبحذف جميع التعقيبات التي تمس بأي طائفة. كما نلفت انتباهكم انه يمكنكم ارسال مشاكلكم على العنوان التالي:alarab@alarab.net