زجل للطّلّاب – مَن جَدَّ وَجَد/ بقلم :اسماء طنوس

بَحكي لكُـلِّ الطّـــلّاب --- شِدّوا الهِمِّــه يا أحباب أعطوا نتيجِه مليـــحَه --- جايِه العُطلِه عالِابواب

تذَكَّروا المَثَل شو قال --- اللّي بيِتعب راح ينـــال
واللّي بيِزرع بيُحصُد --- عليك تُدرُس في الِكتاب

وِالعـــزيمِــه قَوّيـــها --- وبالمــجـــهـودِ كَــفّــــيها
ونتيجِه اللّي ناويـــها --- بتـلاقيــــها ولا تِرتــــاب

حُطّ الأمَـــل قُدّامَــك --- راح بتحــــقّق أحلامَـــك
بُكرَه بتِزهِر أيّامَـــك ---ونجاحَــك بَــعْد الأتـــعاب

ولمّا النّجـاحِ بتِلقـــاه --- كُـلّ التّعـــب راح تِنســـاه
بِتحَصِّل ياللّي بتِرضاه--- بتنسى التّعب وِالِحْســاب

عالفشل إنتَ المسؤول--- لِأنَّـــك كُـــنِت كَســــول
بِتلوم حالَــك وبِتقــول --- شو عيني مِنِ الطُّــلّاب

وِالنّاجح يرفــع إيــدُه ---ربّــي يبـــارِك وِيـزيـــدُه
الِامتِحان ما بـيعيــدُه --- نجـــاحُــه هُــوَّ الجــواب

المكر

موقع العرب يفسح المجال امام الكتاب لطرح أفكاركم التي كتبت بقلمهم المميز ويقدم للجميع مساحة حرة في التعبير عما في داخلهم ضمن زاوية منبر العرب. لإرسال المواد يرجى إرفاق النص في ملف وورد مع اسم الكاتب والبلدة وعنوان الموضوع وصورة شخصية للكاتب بجودة عالية وحجم كبير على العنوان: alarab@alarab.net