بقلم: سيمون عيلوطي

لا تْواخزيني مُهْجِتي
مَعليش
وْلا تْعاتْبيني غِبْت
عَنِّك ليش
بَلاش تِحُطِّي الوَرْد
عا بابـي
يا تِسألي عَنِّي فِ غْيابي
إمِّي المسكينِه وِاصْحابي، ...
وْمَ تْنادي بالحارات
عا اسمي
تا يِعرِفوني تِحمِلي
رَسمي
وْحافيه لا تُرُكْضي
عا ضَوِّ هَالقنديل
تا تِقْفِشيني بْلُعبِةْ شَدِّه
يَ بْلُعبِةْ تِهْبيل، ...
لا تِتْعَبي من شاني... بِدِّيش
مِشْ فاضي حَتَّى طَفْشِك
تِطْفيش!!
*
كُنت إروَش طايِش
في السَّعدَنِه
مـاخِذ الدِّنيـا مَعاكـي
فْ وَلدنِه
مْجَنِّنِك بِالشَّقْوَنِه...
وْبِالشِّيْطَنِه، ...
لا تْواخزيني مُهْجِتي
مَعليش ...
مَ عرِفْت أقدِّر
حُبِّك قدِّيش...!
*
كُنت بايِن فيكي
مِشْ مِعتِني
مَجنون ماشي
في دِنْيا مْلوَّنِه
فْخاخ أنصب للرَّقاطي
يا شْباك
مع غَزال البَر أفوت
في عِراك
عَالبحرَه أعمَل خيمِه
من خيش
وْأيَّامي قَضِّي
ألْعَب شيش بيش!
*
كُنت أتجاهَل ..
هَمسِك وِالوَشوشِه
وْتِدبيل عينيكي
وِالدَلَع وِالنَّغْنَشِه
وْلمسِة إيديكي لَمَّنْ
أبدا أروق
تِمسِكيني أحسن
عَنِّك ألوق
وْكَمِّل طَريقي
في اللَّهو وَفِ الطِّيش
*
عَ جْديد تِسحبني ...
قُوِّه جارِفِه
مَشدود كُلِّي صوبِك
في عاطِفِه
فكَّرت بِاللي فِيي
مِشْ عارِفِه
تاريكي ثمرَة حُبِّي
عم تُقطُفي
تا نِلتِقي شو كُنتي
هيك تْوَلِّفي
عْرِفْت جَنبي عَ الدَّرِب
غيرِك مَليش..
بَسْ مَعاكي حُبِّي
يِحلالي عيش!!

 موقع العرب يفسح المجال امام الكتاب لطرح أفكاركم التي كتبت بقلمهم المميز ويقدم للجميع مساحة حرة في التعبير عما في داخلهم ضمن زاوية منبر العرب. لإرسال المواد يرجى إرفاق النص في ملف وورد مع اسم الكاتب والبلدة وعنوان الموضوع وصورة شخصية للكاتب بجودة عالية وحجم كبير على العنوان alarab@alarab.com