الحاجة تركية أبو ضعوف من ميعار المهجرة: وصيتي لأبنائي بأن يدفنوني في ميعار

ميعار المهجرة وأهاليها في ايام العز محفوظين بذاكرة الأبناء ولمن عاصر الاحداث الأخيرة قبل سقوطها والقصص فيها كثيرة حتى اصبحت ميعار رمز النكبة ويتم تداول الحديث عنها في كل يوم يتم فيه ذكر النكبة كون أن مأساتها تنطبق على كثير من القرى العربية الفلسطينية التي هجر اهلها. الحاجة تركية قاسم أبو ضعوف من سكان ميعار المهجرة تتذكر طفولتها وشبابها في بلدتها التي هاجمتها العصابات من كل حدب وصوب وهجر اهلها في ليلة بلا ضوء قمر وكان عمرها 25 عاما ومتزوجة منذ ستة أشهر ونجلها الاول انجبته في شعب بعد ان تم تهجير العائلة.

حياتنا في ميعار كانت حياة "غندرة العرايس" وأنا قبل 15 عاما طلبت من ابني ان يوصلوني لميعار ودورت هون في كل محل وصرت اقله هون كان بيتنا وهون كان الجامع وهون كان دكانة وعندما وصلت فرشت بمحل بيتنا وحطيت راسي على الهوى الغربي سهيت عيني ونمت وحلمت إني اعود اليها وانا اوصي ابنائي بأن يدفنوني في ميعار". قالت الحاجة في حديث لمراسل موقع العرب وصحيفة كل العرب.
وعن الحلم الذي حلمت به قالت الحاجة لمراسلنا: "باطل ..باطل .. والوطن هو في مثلو أنا دخيل رب هوى ميعار وأهل ميعار وأنا كل سنة باجي انا وولادي وولاد ولادي وبنقعد وبنتذكر كل شي صار معنا ومنعلمهن حتى ما ينسوا وما يصيبهن يلي صار معنا.

الحاجة تركية قاسم أبو ضعوف

أنا لبكي على حالي وانا حَيّ ... ومين إل مات بَعِدنا وأنو حيّ
ومِثِلنا ما ابتلى آدم ونوحَي ... بْحيثْ بلادنا صَبْحَتْ خَراب

وحول طرد اهل البلدة منها قالت الحاجة تركية أبو ضعوف:"إحنا كنا بأمان الله وسمعنا أنو اليهود بفوتوا على البيوت العربية وبقتلوا الصغير قبل الكبير اجتمعوا الكبار في بيت المختار مرعي حسن الطه وقسم من الي كانوا قالوا لازم نسلم لانو البلاد كلها سلمت ومنهن قالو لأ ما بدنا نسلم والناس إشي صار يظبظبو اغراضهن ويتسحبو واحد ورى الثاني بعد الفطور وكان يومها الدنيا رمضان والناس صايمة، وفكروا انو اليهود بدن يفوتوا على البلد والصبح بعودوا يرجعولها الا انو الي صار انو اليهود فاتو ومنعو حده يرجع عليها وبقي كثار من اهل البلد موجودين قرب البلد من شرقا والصبح صار جنود اليهود يطخوا علينا ومن اهل البلد ناس شرقو على سخنين وفي منهن شملو على الشاغور مجد الكروم وغيرها ومنهن اللي راحوا على شعب وعيلتنا ظلينا في شعب إحنا وعمامنا واخوالنا وكثار اللي طلعوا من البلد وما عرفنا وين راحوا الا بعد ما هديت الحرب ووقفت صرنا نسمع ان كثار اللي راحوا على سخنين وإشي راح على كابول وطمرة ومجد الكروم وناس ثانيين طلعوا على لبنان وظلو فيها.