زجل السعادة فيك لا تفتّش عليها/ بقلم: أسماء طنوس

السّعادِه ان ما كانت فيك ___ مِش مُـمكِـن تلاقيـها
ولَوْ فيــكَ راح بِتكَـفّيـك ___ ما في شي بيساويها
_____________________________
لَوْ قلبـَك ما فيـه سـلام ___ بيبقى قلبَك فارغ فيك
بـتـعــــيش بهـَـمِّ وآلام ___ مين اللّي بَدّو يِشفيــك
ولَوْماتت فيك الأحـلام ___بيجي اليَأس يعَشِّش فيـك
بتْصــير تْـقول بمَـلام ___ زهِقْت الدّنيي وما فيـها
_____________________________
السّعـادِه منِ القناعَــه ___ هِيِّ كنـوز وما بتَـفــنـى
أمّا قْلــوب الطّمّاعَــه ___ كُل شي عندا وما بْتِهنى
وناس ثيــابا لَمّـاعَــه ___ بقلبا نَقْـص وما بتِـغْــنـى
ناس ال هيك أطْباعا ___ الطّــمــع ما بيــداويـــــها
_____________________________
القناعه هـداة البـال ___ غِــنى وسِلْــم ومـحـــبِّــه
والحالِه بأحسن حال ___ هايِ نعــمِـــه من ربّـــي
بشكر ربّي ياللّي شال___ الهَمّ السّاكــن في قلبـــي
والرّوح فِيَّ عال العال___ بأشعاري اللّي بَرويهــا

 موقع العرب يفسح المجال امام الكتاب لطرح أفكاركم التي كتبت بقلمهم المميز ويقدم للجميع مساحة حرة في التعبير عما في داخلهم ضمن زاوية منبر العرب. لإرسال المواد يرجى إرفاق النص في ملف وورد مع اسم الكاتب والبلدة وعنوان الموضوع وصورة شخصية للكاتب بجودة عالية وحجم كبير على العنوان:alarab@alarab.net