مشكلتي حرق صغير بجسمي...

وصلت الى موقع العرب رسالة من فتاة تطلب ارشاد ونصيحة زوار موقع العرب الكرام. موقع "العرب" يؤكد انه وحفاظا على النزاهة والمصداقية الصحفية ينشر الرسالة تماما كما وصلت الى مكاتبنا، من دون زيادة او نقصان، وبدون تعديلات لغوية او تصحيح اخطاء املائية..

مرحبا شباب وصبايا .. انا بنت من الشمال .. عمري 19 سنه .. الحمد لله حلوة ومتدينه ومو ناقصني غير رحمة الله وعباده ...
مشكلتى انو كل ما بنخطب الخطبه بتتفركش انخطبت مرتين وتركت .. الخطيب الاول تركتو انا لانو ابووه كان يعملى مشاكل الله واستغفر الله وطفشني بس الشب كان وما زال بحبني بس انا لاء ما بحبو ولا حتى كنت احس بأمان معاه ..والخطيب التانى امو لما عرفت ان عندى حرق باجري فضحتني وصارت سيرتي على كل لسان وانا من هبلي ارجيتها جسمي لانو عادي هاد الي الله اعطاني اياه وهي فضحت سري قدام كل الناس وبعد كل هاد خلت ابنها يتركنى وتركنى مع انو بحبني الله لا يوفقها ولا يسامحها .. انا اسا محدا بقرب عليي الكل مفكر انى مشوها ويمكن من ورا هالشي اعنس وما اتزوج .. والغريب ان الخطيب الاولانى اجا عنا عالبيت وحكى انو لسا بدو اياني وبدو نرجع وبعد ما بديت افكر بجديه راح ومرجعش ولا حتى تلفون .. قام انا عرفت انو كزاب وحابب يلعب ومهتميتش كتير لانى اساسا بحسش بالامان معاه .. بس الي موجعنى اني مرفوضه دايما بسبب الحرق((  مع العلم اني عملت تجميل و 90% منه اختفى )) بس الناس هيك تفكيرها .. حياتي تقريبا واقفه ماليش نفس على اشي حتى تعليمي مكملتوش وانا الحمد لله من الاوائل بس حظي ناقص L
سؤالي للجميع ليش المظاهر صارت أهم من الجواهر ؟؟؟ وليش انا بالذات الي بتعيب علشان عندى حرق ؟؟؟ وانو كيف وليش الواحد بترك حبيبتو علشان هيك شي ؟؟؟
بتمنى محدا يتمسخر عليي او يجرحنى بكلمه لانو مو ناقصني .. وشكرا على انكو قريتو مشكلتي !! وشكرا لموقع العرب (( يا ريت تنشرو قصتي باسرع وقت ممكن ))

موقع "العرب" يوجه عناية الزوار الى انه بامكانهم ارسال مشاكلهم وتساؤلاتهم الى الموقع لاخد رأي الزوار فيها على alarab@alarab.co.il