دليلي احتار/ بقلم: عبور درويش

 دليلي احتار !!!

يا عمي الختيار

يا أبو الحطة والعقال

إنت مواكب الأجيال

document.BridIframeBurst=true;

var _bos = _bos||[]; _bos.push({ "p": "Brid_26338945", "obj": {"id":"19338","width":"100%","height":"320"} });

وشايف سوء الأحوال

بدي جواب للسؤال

أنا من أهل البيت

وبطلعلي حق التصويت

صوتي فقير وصغير

بس يمكن له تأثير

وإنت حكيم وجليل

بدي منك الدليل

لأرتاح من التفكير

يا ولدي يا بن هالجيل

لا تحطني بموقف عسير

انت شايف هالأيام

الحكمة عملة كلام

والصغير ما له كبير

يا عمي بدنا تدبير

خليك محضر للخير

لسعتنا الحياة كتير

صار لازمنا تغيير

يا ولدي حكينا زمان

لحد ما هرّوا الأسنان

الوعود ما لها ضمان

وما بقي أمن وأمان

لا تتأمل من علان

ولا تتوكل على فلان

الحكي وتدوير اللسان

أسهل شغلة عالإنسان

يا بني خليك بحالك

إتفرّج ولا تتعب بالك

صون نفسك وعيالك

وتوكل ع الله وحالك

ربي بيتك عالصلاح

الخير هو المفتاح

قوم بواجبك عالأصول

وعن عملك كون مسؤول

لا تستنى التغيير

لأنو أصحاب الضمير

من كثر التحليل والتفكير

صابهن ألزهايمر بكير

وإذا مصمم عالتدوير

شوفلك شخص قدير

يكون غني ومش فقير

عن نفسه بفضّل الغير

وماضيه حافل بالخير

مهم يكون إنسان

يحترم كل الأديان

يصون العرض واللسان

ويقدّر وصايا الرحمن

وإذا لقيته يا خيي

بحلفلك بهاي اللّحية

لما يقعد عالكرسي

حتى بوعودُه يوفي

بدو المصباح السحري

ويمكن حتى مــــا يكفـــــي !!!

 

موقع العرب يفسح المجال امام الكتاب لطرح أفكارهم التي كتبت بقلمهم المميز ويقدم للجميع مساحة حرة في التعبير عما في داخلهم ضمن زاوية منبر العرب. لإرسال المواد يرجى إرفاق النص في ملف وورد مع اسم الكاتب والبلدة وعنوان الموضوع وصورة شخصية للكاتب بجودة عالية وحجم كبير على العنوان:alarab@alarab.net