لو سألتك شو معنى كلمة ناجح/ بقلم: رونق عمري

لو سألتك شو معنى كلمة ناجح. شو رح تجاوب؟
فكر بينك وبين نفسك شوي، شو تعريفك للإنسان الناجح؟
.
.
بعرف صعبه شوي عليك، لإنك لقيت كثير معاني وتفسيرات يمكن..
السبب؟ بتعرف شو السبب؟ لإنك إنت بعدك مش عارف شو هي الطريقة الوحيدة إلي رح تقودك لقمة نجاحك.
عشان تعرف، لكل إنسان في بس طريق واحد ووحيد للوصول إلى القمة، ليش بعمرك شفت حدا ناجح بالغناء بشكل رهيب وبرضو كاتب عالمي وبرضو لاعب كرة قدم لامع؟ أكيد لا، ولو كان في إنسان ملم بأكثر من مجال يكمن تكون متقاربة جدا باللي بتعبر عنه أو أنه الإلمام مرات بخليك شوي ناجح هون وشوي هون وشوي هون، بس إنت عمليا مش مبدع بشكل كبير في كل المجالات.
هون بتبلش المشكلة الحقيقية، لازم تعرف أنه الله عز وجل عادل، لما خلق البشر أعطى هبة مميزة لكل جسد نفخ فيه الروح، طيب..إنت ليش برأيك إستصعبت تفسر معنى كلمة ناجح؟ الجواب بسيط، لإنك لحد اليوم إنت ما عرفت شو الهبة إلي الله أعطاك إياها، الحل؟ إكتشف نفسك!
من المعتقدات إلي أنا دايما بحاربها أنو "قدراتك أعلى من قدرات فلان، فلان عندو ضعف عقلي، فلان معذور، شو يساوي؟ هاي هي قدراته!.."
غلط!! غلط!! قصدك فلان تمرينه العقلي مطور أكثر، تجربته أكبر.. دليل؟ كل العقول إلها نفس عدد الخلايا وإلها نفس التقسيم ونفس طريقة العمل، حقيقة!
ومن الحقائق إلي قرأتها: أن العقل فيه ملايين الخلايا، وكل خليه تستطيع إحتواء كم من المعلومات كالتي في مكتبة أكسفورد!
شو رأيك؟ طيب ما في شك إنه في تفاوت بالنتائج والتحصيل العلمي والعملي بس ليش؟
لأنه الجنين وهو ببطن إمه من اللحظات الأولى لوجدانه ببدأ بالإكتساب، الخبرة، تلقي معلومات، ولو ما كان هيك كان ما أوصى الأطباء المرأة الحامل بالقراءة لأنه "المولود بطلع أذكى".
منشوف مرات أطفال بالسنين الأولى بتعرف كل الألوان، بتعد حتى 100، بتحكي حكي بدل على نضج وسابق جيلها... طبعا هاي مش لأنه وهو نايم حلم بهاي الأشياء وصحي يقولها، بس لأنه إذا دورت وراه بتلاقي عنده أهل متابعينه، بقعدو معو كثير وبفهمو كلشي وبدربو عالأشياء من جيل صغير.
في طفل عمره 12 سنه حافظ القراّن كامل مع العلم أنه "منغولي"، كيف صار هيك؟ بمقابلة مع أمه تبين أنها من أول ما فتحت عينيها على حقيقة إختلاف إبنها بلشت تدربه على أشياء تانية تسد مكان النقص إلي عنده. يعني الله صح أخد منه إشي بس عوضه بغيره.. وإمه قالت مع إنه مش إبنها البكر بس من شدة حب الناس إله بنادوها أم "عبد الوهاب" على إسمه.
مرض التوحد.. إلي بعانو من هاد المرض معروفين بأنهم من أشد الناس ذكاءا والأقوى ذاكرة.. منهم رسامين مبدعين برسموا منظر حقيقي بزمن قياسي بعد تأمل شيء كالذي رسم مدينه نيويورك كامله بعد النظر إليها من خلال هليكوبتر لمدة 10 دقائق.
فتاة أمريكية تعاني من التوحد هي مسجله لأول إختراع برنامج لغسل وتربية قطيع بقر كامل بدون أي أذى لأي بقرة! مع العلم أنه بالبدايه ما حدا آمن بقدراتها.. بتجربة لهدف تاني ولتوضيح التساوي.. 2 توائم متماثلين منقسمين من نفس الخلية كل واحد تربى من اول يوم بحياته ببيئة مختلفة، النتيجة: كل توأم كان اله تحصيل ومدى مختلف من التفكير. هم بالأساس لهم نفس العقل ونفس الجينات لكن الأشياء المكتسبة المختلفه بينهم أدت لها الإختلاف.
كل هاد توضيح أنه ما في حدا ناقص وما في حدا معندوش نقطة قوة تميزه عن غيره من البشر.
نرجع لتفسير كلمة ناجح..
- من عرف نقطة قوته وطورها وعمل عليها على مر الزمن وكان يدرك طريقة الوصول إلى القمة من خلال نقطة القوة هذه، لأن نقطة القوة هذه هي الطريق.
كل طريق فيها عقبات، شو هي عقبات هاي الطريق؟
الناس كثير مرات بستغربوا عمل معين أو بقولوا "فلان شو بدو بهالشغله؟ يروح يجيب حيالله شهادة ويتجوز ويصرف عحاله ويعمل عيله.. ويعيش"!
طيب؟ وبعدين؟ هاد حلمك بالحياة؟ تكون إنسان عادي؟ كل يوم نفس الشغلة نفس البرنامج اليومي وكمان عاشي بتحبوش؟ بس لمجرد إنك تحصل على الإستقرار؟
برضه كمان مقولة سمعتها وعجبتني "كثيرا من الناس يريدون القمة لكنهم غير مدركين أن السعادة الحقيقية تكمن في تسلقه".
نعم تسلقه، لنفرض أنك وصلت للقمة أو بمعنى تاني "الإستقرار"، شو بعدين؟
لازم تعرف أنه الإنسان باللحظة إللي بوصل فيها القمة هو عمليا "بموت".
لهيك، خلي كل يوم من حياتك إكتساب، خبرة، تجربة، مثابرة، لأنه الحياة أما مغامرة جريئة أو لا شيئ.
وإنسى شو بدهم "همي". لأنو "همي" مش عايشين عنك، مش رح يحسوا بهمومك، مش رح يسدوا ديونك، مش رح يعانوا مرضك، مش رح يصحوا الصبح يوكلو، يشربوا ويتنفسوا عنك.
"همي" بس رح يدفنوك لما تموت، لأنه هاد هو الإشي الوحيد إللي إنت بحاجة الناس فيو وبتغدرش تساوي إنت بمجهودك.
يالله.. إعرف حالك وبلش تسلق بالجبل ولا تستعجل، لا تستعجل عالقمه.

صندلة

موقع العرب يفسح المجال امام الكتاب لطرح أفكاركم التي كتبت بقلمهم المميز ويقدم للجميع مساحة حرة في التعبير عما في داخلهم ضمن زاوية منبر العرب. لإرسال المواد يرجى إرفاق النص في ملف وورد مع اسم الكاتب والبلدة وعنوان الموضوع وصورة شخصية للكاتب بجودة عالية وحجم كبير على العنوان:alarab@alarab.net