زجل عصر البليفونات/ بقلم :أسماء طنوس

 صِرنا بهالزمانِ اليوم نقَلّل منِ الزيارات
ما عاد عند الناس وَقِت يترَيَّحـوا فِيّـــو
بِتشوفهُم بَعد الشّغُــل مِســكوا البليفـونــات
تَيْرِنّوا للأصحاب ورسايِل يبعـثوا مِنّــو
وبتـلاقي كُلّ العيلِــه معهــا أوْلاد وبنــات
الواحد عنِ الثّاني بعيد في مَعــزِلٍ عَنّـــو
صِفْيَتِ العيلِه مفَكفَكِه ما بتِعرِفِ القعــدات
واللّمِّه طَعمِتها اختفـــت ما عادوا يتـــهنّـوا
مِن دون حنان وحُب ولا دِفْء وسَهرِيّـات
وماعادت عُيونهُم تِلتقي والِقلوب ما حَنـــّوا
وصوت بينادي عَالإبن تَع نحكي الِحكايات
بَيَّك وأمَّك حابّين يشوفوك معاهُــم اتمَـنّــوا
حتّــى الطِّفِــل اليوم وهُــوِّ بعُـمُــر سنــوات
بيِــلعـب على الآيبـاد ساعــــات وما هَــمّـــو
ما عادوا يلعبوا بطابِـه ولا ينُطّوا عَالحبلات
وبطّلوا الحلقـــات ال فيها بيُــرقصـــوا يغَنّـوا
وما عاد عندهم وَقـت يتنــاولوا الوجبــــات
وحتّى لا تفوتهُـم ساعة عنِ الأكــلاتِ استغنـوا
وأهمـــلوا الِدروس وما عمـلوا الواجــبــات
وقَضّوا من وقتهِم عالحاسوب كثير منِ السّاعات
والأهل نايمين والإبن ما بيعرفوا عَنّو

المكر 

موقع العرب يفسح المجال امام الكتاب لطرح أفكارهم التي كتبت بقلمهم المميز ويقدم للجميع مساحة حرة في التعبير عما في داخلهم ضمن زاوية رأي حر.. لإرسال المواد يرجى إرفاق النص في ملف وورد مع اسم الكاتب والبلدة وعنوان الموضوع وصورة شخصية للكاتب بجودة عالية وحجم كبير على العنوان:alarab@alarab.net