كان ياما كان – بقلم: رباب عابد
قصة مكونة من كلمات مبعثرة الفكر ومن خيال عقلي لكن في الحقيقة قصة واقعية سقطت فيها عدة فتيات...
قصدت بان تكون الكلمات غامضة لاني لا اريد أن أدخل بصلب ذاك الموضوع, لاني حين أدخل في محتويات تلك الأحداث لن انتهي من الكتابة سوف اصنع كتابا كاملا لهذه القصة.. لذالك اختصرت وجعلت الكلمات غامضة..وكل قارئ سيأتيه هاجس عند قراءتها فكما قال فكتور هوجو (لا تكثر الإيضاح فستفسد روعة الفن).
كتبت القصة باللغة العامية, لا ادري لماذا لكني كتبتها ولن أعيد صياغتها بلغة الفصحى..
كان ياما كان انسان ولا متل أي انسان ومع مرور الأيام صار متل كل انسان
خاين ومخادع واناني وظالم كمان
ليه يا ربي تربطني بهالانسان
(يلا مهي حياة ومارقة)
كانت البداية حلوة كتير
كنا احباب.. لا حتى كنا احلى عشاق
عِشِقنا كان جنون لدرجة انو سلمتلو وسلمني
آه سلمتلو وسلمني
ياما احلى هديك الايام.. ولا كل الايام
بس أجا هداك اليوم وصحيت
وكل هديك الايام كانت احلام
فيكو تقولو كنت شاربي قنينة تاكيلا
لتني عشت هديك الايام
ومن بعد ما خلص مفعولها
أآآآه لو تعرفوا
صحيت من هديك الايام
وتغير كل شي
الانسان الي بديت اكتب عنو راح اكمل كتابتي عنو
وراح اقول بانو هاد مو انسان
هاد حيوان وحقير ونجس كمان
ويلا مهي خرباني وخرباني
فيكو تسامحوني على الفاظي
صدقوني هو بستاهل
وبستاهل اكتر من هيك كمان
بس انا مع كل هاد راح احترم الكلمات اللي بكتبها
وطبعا احترمكو انتو كمان
كنت مفكرة حالي قوية كتير وذكية
ومن بعد ما اكتشفت بانو مو هداك الانسان
كان شعوري بوقتها باني هبلة وغبية كمان
اول مرة بحكي هيك
بس هيك كان شعوري
لما سالتو هداك السؤال
جاوبني بكل وقاحة متأسف وكتير كمان
قلبي حسيتو وقف لتواني
حسيت باني عم أمثل فيلم
وفيلم رومانسي وحلو كتير كمان
نهايته ندمت عليها
بانو بطلت الفيلم
سامحتو..آه سامحتو
لو كنت بدلها كان رفضتو وبزقت بوجهه كمان
بس ...
مع هيك وافقت اكمل طريقي معا
لاشوف نصيبي
مع انو نصيبي باين شو هو
وعلى قولة شكسبير
(ليس من الشجاعة إن تنتقم، بل إن تتحمل وتصبر.)
القصة هاي قصة عادية
مرت على كثار من هالـ بنات
في منهن اللي سامحوا
وفي منهن اللي تركو وغدروا كمان
وانا من هالـ بنات
اللي سامحوا بس مو على طول
راح ييجي هالـ يوم
ويصير اللي يصير
ويلا مهي حياة ومارقة كمان