على شو بدنا نحسدكم؟!!!

يعيش اليهود أكثر من  العرب في إسرائيل بثلاث سنوات ونصف !
- صحتين ومبروك عليكم يا اليهود ..ويلعن أبو اللي زعلان! يعني على شو بدنا نحسدكم ! على القحّة والضراط والرطاط والبامبيرز بآخر العمر...
- **
الطبّاخة في مركز الشرطة في معبر إيرز سمعت أصواتا غريبة تحت المسطبة والشرطة أخلت المركز فوراً خوفاً من وجود خندق للفلسطينيين تحت الأرض!
_ هذه سابقة قانونية ومن الآن فصاعداً كل سيدة لم تزْبط معها الطبخة بإمكانها أن تقول لزوجها .... سامعة أصوات غريبة تحت الأرض ! وعُمُر ما حدا تبلعس!
- **
- عقدت في واشنطن قمة أمريكية فلسطينية هذا الأسبوع!
أبو مازن لبوش- كل مرّة بتضحكوا علينا ومنصدّق أنكم ناويين تحلوا مشكلتنا!
بوش –  خلّينا نخلّص من الخطر الإيراني وبعدين بوعدك وعد شرف تشوف إشي مليح!
أبو مازن _  شو يعني إشي مليح!
بوش _ يعني أطلب شو ما بدّك!
أبو مازن – بدي دولة !
بوش _ الله يسامحك ، طيّب ليش ما حكيت قبل رمضان كان دبرناها !هيك راحت لبعد العيد ..   
- **
- دعا محمد القذافي نجل العقيد معمر القذافي بابا الفاتيكان بندكتوس الى اعتناق الإسلام!وذلك في رده على أقوال البابا!
-  المشكلة عند البابا ليست أن يؤسلم فهذه بسيطة، ولكن التشطيف والوضوء من دغاشيش الله لصلاة الفجر بمياه روما الباردة  هي المشكلة!
- **
- قال عمير بيرتس أن الصراع مع الفلسطينيين ليس قدرا محتوما وإسرائيل تطمع بعلاقات سلام مع الفلسطينيين!
- يا حضرة وزير الحربية إلك سلام خاص من رجل لافف لفة سوداء وله لحية يشوبها قليل من الشيب وعيونه بلمعوا هيك ها!ولهجته لبنانية واليوم عنده مهرجان في بيروت! حضرتك قلت إنو رايح يذكر اسمك الى الأبد داير بالك ؟ طيب بِسلّم عليك وبقلّك إنه بعدوا ذاكر اسمك مليح ! مش حضرتك معمّر البيرزاني! 
**
- اسرائيل ألقت على لبنان مليون و300 الف قنبلة عنقودية خلال الحرب الأخيرة!
- ولو حرام عليكم! شو خليتو للسلام العادل والثابت مع الفلسطينيين!
**
_ إنقلاب أبيض في تايلاند
_ يا أخي أبيض أحمر إعملوا شو ما بدكم! بس حلوا عن لحم الكلاب!
**
__ثور محيط خصيتيه 47 سنتمرا!
- أكيد هذا الثور مقرّق ومفكرينه مثل محمد سعيد عطا عبد العال!
- ومن هو محمد سعيد عطا عبد العال!
- ولو! هذا شقيق صالح سعيد عطا عبد العال!
**
أربع سنوات سجنا لعكاوي انتحل شخصية رفعت ترك ونصب أموالا باسمه!
- ولو! لو قتل ثمانية عرب بحادث سير كان أحسن له ... ستة أشهر في خدمة الجمهور ويا دار ما دخلك شرّ! 
**
_إسرائيل صادرت يوم أول أمس الإربعاء من محلات صرافة في رام الله ونابلس ما قيمته ملايين الدولارات!
- لكان من أين سيدفعون المصاري التي وعدوا فيها المجالس العربية في الجليل؟
**
قال جمال حسني مبارك ولي العهد في جمهورية مصر العربية هذا الأسبوع أن على مصر النظر بإمكانية الحصول على الطاقة النووية نظرا لضآلة موارد الطاقة في مصر!
- أي أُسكت أحسن ما بوش يسمعك! ساعتها بحياتك ما بتصير رئيس!
**
مديرة حسابات من الكريوت متهمة بسرقة 4 ملايين شيكل من جمعية خيرية عملت بها!
- ولك يا هبلة شو خليتي للمدير!هيك أحسن يفسد عنّك!
**
قريع يلتقي شخصيات لبنانية هامة ويبحث معهم مسائل هامة!
- شو ما بدكم توصّوا على إسمنت لإعادة  الإعمار!
**
ليفني تدعو لعلاقات مستمرة بين عباس وأولمرت
– طيب تفضل اشرب قهوة!ميّل يا زلمة! ولو طالع على أمريكا وما بتميّل!يله خيّا عباس! القهوة على النار! يا زلمة يلعن ابو أيرز على أبو سديروت! أنت بتشربها مرة ولا حلوة!ولو! شو حواجز وتفتيش وبهدلة !إنت بس قلّهم رايح عند أولمرت ..وشوف الصحة كيف بتصير!      
**
البابا يؤكد احترامه لجميع الأديان الكبرى!
- مليح..وشو مع الوسط الدرزي!
**
هذه حقيقة
 الرئيس اليمني علي عبد الله الصالح يمنح الراسبين في الثانوية العامة ( هدية )عشر درجات كي يلحقوا ربعهم!
- الحمد لله،على هذه الحسابات أنا ناجح بالرياضيات والفيزياء والطبيخ كمان!