شاب: أعيش بين نارين.. خطيبتني الحساسة جداً والناعمة ووالدتي قاسية الكلام

أبرز ما جاء في الرسالة:

انا مرتاح جداً مع خطيبتي يعني سمنة ع عسل بس المشكلة انه والدتي الله يطول بعمرها بطل يعجبها العروس اللي بايدها نقتها

مش عارف شو اساوي، لما بقعد مع خطيبتي واهلها بشكولي عن امي وتعاملها والفنسات والحكي الواقف اللي بتحكي ودايما نفس الجواب بقلهن امي مش قاصده

وصلت الى موقع العرب رسالة من شاب تطلب ارشاد ونصيحة زوار موقع العرب الكرام. موقع "العرب" يؤكد انه وحفاظا على النزاهة والمصداقية الصحفية ينشر الرسالة تماما كما وصلت الى مكاتبنا، من دون زيادة او نقصان، وبدون تعديلات لغوية او تصحيح اخطاء املائية.

سلام إلى موقع العرب الموقر، وسلاماتي لزوار الموقع..

مشكلتي مش هوينة .. بتغروا تقولو هاي مصيبة مش عارف كيف اتخلص منها، ومش عارف كيف ممكن استوعب اللي عم بصير.. انا خطبت قبل كم شهر، والحمدالله خطبة تقليدية، امي شافت العروس اعجبتها، اجت قلتلي يما انا لقيتك عروس زي القمر، وبالفعل العروس حتى أحلى من القمر، ورحنا عند الجماعة وتعرفنا ع بعض، وخطبنا، زي اي تنين..


صورة توضيحية

مواقف محرجة !
والحقيقة أكثر، انا مرتاح جداً مع خطيبتي، يعني سمنة ع عسل، بس المشكلة انه والدتي الله يطول بعمرها، بطل يعجبها العروس اللي بايدها نقتها !!صارت تطلع فيها مليون مشكلة، بطيئة، غنوجة، دلوعة، مش مدعوكة، وهون بتبلش المقارنات بين خواتي وبينها !!
وطبعاً امي اللي بقلبها ع راس لسانها... بتحكي وبتجرح بالحكي وبتزت حكي وبالاخر بتقول لخطيبتي تزعليش مني انا بحكي لمصلحتكو.
وقبل فترة، كنا قاعدين عين الله علينا، وكانو اهل العروس سهرانين عنا، خطيبتي وهي بتقشرلي حبة فواكهه وقعت السكينة، اجت امي بتقولها هاتي من ايدك اللي متلك ما بنفع يفتح بيت. بوقتها حسيت خنجر وفات بصدري.. هادا الحكي قدام اهلي واهلها وخواتي وجوز اختي..

الخوف من القادم
مش عارف شو اساوي، لما بقعد مع خطيبتي واهلها بشكولي عن امي وتعاملها والفنسات والحكي الواقف اللي بتحكي ودايما نفس الجواب بقلهن امي مش قاصده ودائما بواجهه نفس الموقف المحرج.. مع انه امي ما بتكرهها.. ولما بقعد مع امي .. ما بتخلي حكي ع العروس واهلها..
مششششش عارف شو اساوي.. انا غرقان في بحر نار.. خايف لقدام يصير مشاكل وتكون امي السبب في انفصالي مع اني بحبها لخطيبتي وكتير متعلق فيها ومرتاح معها.

يطلب موقع "العرب" من زواره عدم التعقيب بصورة طائفية عنصرية وعدم الانجرار وراء معقبين عنصريين، وتسعى إدارة موقع "العرب" بتشديد الرقابه على التعقيبات وبحذف جميع التعقيبات التي تمس بأي طائفة. كما نلفت انتباهكم انه يمكنكم ارسال مشاكلكم على العنوان التالي: alarab@alarab.co.il