للمأسوف على شبابه المرحوم هادي صلاح عامر

شعر – الشاعر الزجلي المنبري صالح خيرالدين

‏03‏ شباط‏، 2011
ذرفي يا عيون دمعاتك وهلّي هادي ال بعمر الورد والفله
بكّر الفلّي وقصّر المشوار بلكي الدمع بأجل الفلّي
عشرين تا يوفّي ربيع الغار ع الباب ناطر آب متحلي
وشباط تا يقطف قمرنا غار وصاحت شهور العمر يا دلّي
بعدك قمر عم تفلش الأنوار فيك البراءة مشعشعه الهلّه
بعدك ثمر عم تغمروا الأشجار يا قدر ليش تحضّر السله
وأمك غصون عليك عم بتغار شلعت الغصون عيونها مخلّي
تملّي يا خلّي دموعها الأبحار محلّك دخيلك مين بيملي
ونادى صلاح ألبي بعدك نار ونورك بعيني مش رح يولي
وداني يا خيي عم بيصرخ صار محلّك تركني وكون بمحلّي
ديانا وعدن حضنت سحر بالدار لوين تارك بيتنا قلّي
بعدك عريس مكلّل بأزهار ناطر طلوع المرتبه تحلّي
وجيلان ع الفرقه فرحها إنهار مندموعها عم تغزل الحلّي
ورغم الفراق وقسوة الأقدار فينا أيمان العقل متجلّي
وهلق بجيل جديد عرسك دار بفرحة أهل للطفل بتصلّي
بدعي إلهي يجمع الأعمار وهادي بجيل جديد عمرو تزيد
ونقشع إلو ع ديارنا طلّه